Sa isang mundo kung saan ang pagkawala ng paningin ay isang krisis, hindi nalalayo ang Pilipinas sa hamong ito. Para sa maraming Pilipino, ang mga problema sa mata, partikular na ang sakit sa retina, ay isang malaking alalahanin sa kalusugan at ekonomiya. 

Kaya naman, nakiisa ang Department of Social Welfare and Development (DSWD) sa iba’t ibang sektor para solusyunan ito. Sa isang pagpupulong na tinawag na “Sight-Saving Solutions: Luncheon for Action on Retinal Diseases”, na ginanap sa Makati City, nagtipon ang mga pangunahing stakeholder noong Agosto 28, 2025. Kinatawan ang DSWD ng mga kawani nitong sina Vico Angelo Fajardo, Romel D. Lachica, at Ara Niña G. Ponce.

Nabigyang-diin na bagama’t 90% ng mga kaso ng pagkabulag ay maiiwasan o magagamot, nahaharap pa rin ang Pilipinas sa maraming hamon. Kabilang dito ang lumang mga patakaran at limitadong access sa modernong gamutan at teknolohiya. Bukod pa rito, maraming pasyente ang hindi nagpapatuloy sa paggamot matapos ang unang taon dahil sa kakulangan sa pinansyal na suporta, kahit na epektibo ang mga gamot.

Upang matugunan ang krisis na ito, patuloy na sinisiguro ng DSWD, sa pamamagitan ng Assistance to Individuals in Crisis Situation (AICS) program, na matulungan ang mga kliyente na nangangailangan ng medical assistance. Ayon kay Bb. Ponce, “ang DSWD ay palaging handang makiisa sa mga pagsisikap para makapagbigay ng isang responsable at maagap na serbisyo sa mga kliyente nito.”

Sa pamamagitan ng sama-samang pagsisikap ng mga sektor para punan ang mga kakulangan sa patakaran, access, at kaalaman, kaisa ang DSWD sa pagbibigay ng pantay na pangangalaga sa mata at kabuuang kalusugan ng bawat Pilipino.